上回講到普拉提原本的名字是Contrology，但係由於佢流傳開嚟嘅時候大家都用Pilates的last name稱呼，因而命名。其實我覺得用返Contrology更為恰當，因為你可以從佢嘅名字大概了解佢係做啲乜，Pilates 呢個名就係有型啲，但係就令到好多人聽完個名都唔知係做乜嘢。
我覺得普拉提本身係一個身體運作嘅法則，形式上比較唔係一種獨立存在嘅運動，譬如打籃球、踢足球，只要你係拎住個籃球射緊籃甚至乎係拍緊波，你都可以叫做打緊籃球；又或者用腳踢下個足球你都叫做踢緊波，我唔能夠話你係打緊羽毛球或者做緊自由體操；但係練習普拉提呢，你必須要做到佢嘅神髓，先係練習普拉提。否則極其量只不過係喺reformer上面做緊某種有阻力嘅functional training又或者係拉筋，只係做緊普拉提動作個樣，但係練習唔出 普拉提，嘅核心價值。
究竟普拉提有乜嘢核心價值呢？必需要從佢嘅大原則講起，其中比較重要嘅包括：imagination, flow, centering, alignment, precision, isolation 等等。。。
你必須要 從呢一啲大原則為出發點開始練習。普拉提的動作只不過是一個媒介讓你實踐呢一啲大原則。動作本身是沒有意義的，佢只係提供一種參考，等你可以透過呢一啲movement 去實踐普拉提嘅原則，從而達致身體整合發力嘅訓練目標。
所以練習普拉提想要練得好，必須要有一個目的性，即係你為乜練Pilates，希望逹到什麼結果，例如修正姿勢，提升運動效能，又或者突破體育運動上的瓶頸位等等；沒有目的性，你嘅訓練模式將會變得死板，而進步緩慢。
西方社會嘅訓練模式比較著重系統化；而好多運動嘅推廣着眼點係著重普及化，所以形式上難免缺乏咗口傳身授呢一種特性。所以要練得好普拉提嘅神髓，就更加需要知道佢嘅本質，同埋訓練嘅根基。先可以事半功倍，達至一種治療性、強身健體嘅結果。
眼見好多人學習普拉提，純粹就係練習一個動作；其實大可以上youtube，一小時免費學二三十個動作不是夢。呢個亦都係我哋極少讓新同學上group class嘅原因。
