有幸生活在國泰民安嘅時代，其實真係值得感恩！尤其是喺香港物質豐富，互聯網資訊爆棚，感恩之餘都要記得反省下，究竟感恩緊啲乜嘢！？
昨日食午飯，聽到隔離位嗰個話自己有選擇困難症, 其實我聽過好多人都話自己有選擇困難症, 但係你有冇諗過選擇困難其實未必係人嘅問題，而根本就係社會環境嘅問題。
讀書嘅時候行入文具鋪，買支中華牌鉛筆，最多都係揀紅色定係黃色；又或者買支百樂牌原子筆，嚟嚟去去都係嗰兩個款，根本就唔會選擇困難；行入茶記，快餐、常餐、扒餐, 未行入去都知道自己想食啲乜｡依家行入書局藍色原子筆都三四十個款畀你揀，有趣嘅係無論你揀邊一支，本質上其實冇咩分別；今日食晏嗰間快餐，閒閒地有30樣餸畀你揀，其實遠超於你嘅需要。商業模式令你需要選擇嘅時候，並不是出於你嘅本質或者需要，而係為選擇而選擇，其實好難怪人會好無厘頭咁迷失咗，自以為自己有選擇困難！
日日喺呢一個商業模式導向嘅社會環境底下，其實好難冇精神壓力，有啲人會選擇以旅遊或者禪修之類方式來減壓
。雖然我唔係一個旅遊或者禪修嘅專家，但係我好肯定佢哋嘅本質不是用來減壓，應該係一種生命嘅追求。
至於身體嘅壓力啦，最直接嘅方法，就係用運動。我工作附近嘅環境，閒閒地二三十間運動中心 各有各精彩，而大多數想做運動嘅城市人，都會覺得有選擇困難。有啲又有型啲，有啲就偏門啲 。其實，多數人一星期都係做幾個鐘頭運動, 不如考慮一下，食完飯落街散20分鐘步，星期六日到郊外走走，放工後如果覺得身體真係好繃緊，放鬆平放喺地板上面20分鐘，可能更加來得實際。畢竟運動嘅本質，不是用來製造話題 而係你生活上必須的。
調節好生活節奏，身心靈嘅平衡，再追求運動帶畀你嘅話題性同額外刺激。一定慳番你唔少醫藥費，同埋時間！身體嘅嘢，行得正，先走得遠。
